کتاب: ایمان اور ارکان ایمان

عبداللہ بن حبشی خثعمی رضی اللہ عنہ سے روایت ہے کہ نبی اکرم صلی اللہ علیہ وسلم سے پوچھا گیا : کون سا عمل سب سے بہتر ہے ؟ آپ نے فرمایا : ” ایسا ایمان جس میں کوئی شک نہ ہو ، اور ایسا جہاد جس میں چوری نہ ہو ، اور حج مبرور “ ۔ [سنن نسائي/حدیث: 4989]

انس بن مالک رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” تین چیزیں جس میں ہوں گی ، وہ ایمان کی مٹھاس اور اس کا مزہ پائے گا ، ایک یہ ہے کہ اللہ اور اس کے رسول اس کے نزدیک سب سے زیادہ محبوب و پسندیدہ ہوں ، دوسرے یہ کہ آدمی محبت کرے تو اللہ کے لیے اور نفرت کرے تو اللہ کے لیے ، تیسرے یہ کہ اگر بڑی آگ بھڑکائی جائے تو اس میں گرنا اس کے نزدیک زیادہ محبوب ہو بہ نسبت اس کے کہ وہ اللہ تعالیٰ کے ساتھ کسی کو شریک کرے “ ۱؎ ۔ [سنن نسائي/حدیث: 4990]

انس بن مالک روایت کرتے ہیں کہ نبی اکرم صلی اللہ علیہ وسلم نے فرمایا : ” تین چیزیں جس میں ہوں گی وہ ایمان کی مٹھاس پائے گا ، ایک یہ کہ جو کسی آدمی سے محبت کرے تو صرف اللہ کے لیے کرے ، دوسرے یہ کہ اس کے نزدیک اللہ اور اس کے رسول ہر ایک سے زیادہ محبوب و پسندیدہ ہوں اور تیسرے یہ کہ آگ میں گرنا اس کے لیے زیادہ محبوب ہو بہ نسبت اس کے کہ وہ کفر کی طرف لوٹے جب کہ اللہ تعالیٰ نے اسے اس سے نجات دے دی “ ۔ [سنن نسائي/حدیث: 4991]

انس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے فرمایا : ” تین چیزیں جس میں پائی جائیں گی وہ اسلام کی مٹھاس پائے گا ، ایک یہ کہ جس کے نزدیک اللہ اور اس کے رسول سب سے زیادہ محبوب و پسندیدہ ہوں ۔ دوسرے یہ کہ جو آدمی صرف اللہ تعالیٰ کے لیے محبت کرے ، تیسرے یہ کہ کفر کی طرف لوٹنا اس طرح ناپسند کرے جس طرح آگ میں گرنا ناپسند کرتا ہے “ ۔ [سنن نسائي/حدیث: 4992]

عمر بن خطاب رضی اللہ عنہ بیان کرتے ہیں کہ ایک دن ہم رسول اللہ صلی اللہ علیہ وسلم کے پاس بیٹھے ہوئے تھے ، اتنے میں ایک شخص آیا ، جس کے کپڑے بہت سفید اور بال بہت کالے تھے ، اس پر سفر کے آثار بھی نہیں دکھائی دے رہے تھے اور ہم میں سے کوئی اسے جانتا بھی نہیں تھا ، وہ رسول اللہ صلی اللہ علیہ وسلم کے پاس آ کر بیٹھا اور اپنے گھٹنے کو آپ کے گھٹنے سے لگا لیا ، اپنی ہتھیلیاں آپ کی رانوں پر رکھی ، پھر کہا : محمد ! مجھے اسلام کے بارے میں بتائیے ، آپ صلی اللہ علیہ وسلم نے فرمایا : ” گواہی دینا کہ اللہ کے سوا کوئی لائق عبادت نہیں اور محمد اللہ کے رسول ہیں ، اور نماز قائم کرنا ، زکاۃ دینی ، رمضان کے روزے رکھنا ، اور اگر طاقت ہو تو بیت اللہ کا حج کرنا “ ، وہ بولا : آپ نے سچ فرمایا ، ہمیں اس پر تعجب ہوا کہ خود ہی آپ سے سوال کرتا ہے اور پھر خود ہی اس کی تصدیق بھی کرتا ہے ۔ پھر بولا : مجھے ایمان کے بارے میں بتائیے ، آپ صلی اللہ علیہ وسلم نے فرمایا : ” اللہ پر ، اس کے فرشتوں پر ، اس کی کتابوں پر ، اس کے رسولوں پر ، آخرت کے دن پر ، اور ہر اچھی بری تقدیر پر ایمان لانا “ ۱؎ ۔ وہ بولا : آپ نے سچ فرمایا ۔ اس نے کہا : مجھے احسان کے بارے میں بتائیے ، آپ صلی اللہ علیہ وسلم نے فرمایا : ” اللہ کی عبادت اس طرح کرو گویا تم اسے دیکھ رہے ہو ، اور اگر تم اسے نہیں دیکھ رہے ہو تو وہ تو تمہیں دیکھ رہا ہے “ ۲؎ ۔ وہ بولا : اب مجھے قیامت کے بارے میں بتائیے ، آپ صلی اللہ علیہ وسلم نے فرمایا : ” جس سے سوال کیا جا رہا ہے وہ سوال کرنے والے سے زیادہ نہیں جانتا “ ۔ اس نے کہا : اچھا تو مجھے اس کی نشانی بتائیے ، آپ صلی اللہ علیہ وسلم نے فرمایا : ” ایک یہ کہ لونڈی اپنی مالکن کو جنے گی ۳؎ ۔ دوسرے یہ کہ تم دیکھو گے کہ ننگے پاؤں ، ننگے بدن ، مفلس اور بکریاں چرانے والے بڑے بڑے محل تعمیر کریں گے “ ۔ عمر رضی اللہ عنہ کہتے ہیں : میں تین ( دن ) تک ٹھہرا رہا ۴؎ ، پھر مجھ سے رسول اللہ صلی اللہ علیہ وسلم نے فرمایا : ” عمر ! تم جانتے ہو پوچھنے والا کون تھا ؟ “ میں نے عرض کیا : اللہ اور اس کے رسول زیادہ بہتر جانتے ہیں ، آپ صلی اللہ علیہ وسلم نے فرمایا : ” وہ جبرائیل علیہ السلام تھے ، وہ تمہیں تمہارے دین کے معاملات سکھانے آئے تھے “ ۔ [سنن نسائي/حدیث: 4993]

ابوہریرہ اور ابوذر رضی اللہ عنہما کہتے ہیں کہ رسول اللہ صلی اللہ علیہ وسلم صحابہ کے درمیان اس طرح بیٹھتے تھے کہ اجنبی آتا تو آپ کو پہچان نہیں پاتا جب تک پوچھ نہ لیتا ، ہم نے رسول اللہ صلی اللہ علیہ وسلم سے خواہش ظاہر کی کہ ہم آپ کے بیٹھنے کی جگہ بنا دیں تاکہ جب کوئی اجنبی شخص آئے تو آپ کو پہچان لے ، چنانچہ ہم نے آپ کے لیے مٹی کا ایک چبوترہ بنایا جس پر آپ بیٹھتے تھے ۔ ایک دن ہم بیٹھے ہوئے تھے اور رسول اللہ صلی اللہ علیہ وسلم اپنی جگہ پر بیٹھے تھے ، اتنے میں ایک شخص آیا ، جس کا چہرہ سب لوگوں سے اچھا تھا ، جس کے بدن کی خوشبو سب لوگوں سے بہتر تھی ، گویا کپڑوں میں میل لگا ہی نہ تھا ، اس نے فرش کے کنارے سے سلام کیا اور کہا : ” السلام علیک یا محمد “ اے محمد ! آپ پر سلام ہو ، آپ نے سلام کا جواب دیا ، وہ بولا : اے محمد ! کیا میں نزدیک آؤں ؟ آپ نے فرمایا : آؤ ، وہ کئی بار کہتا رہا : کیا میں نزدیک آؤں ؟ اور آپ صلی اللہ علیہ وسلم اس سے فرماتے رہے : آؤ ، آؤ ، یہاں تک کہ اس نے اپنا ہاتھ آپ کے دونوں گھٹنوں کے اوپر رکھا ۔ وہ بولا : اے محمد ! مجھے بتائیے ، اسلام کیا ہے ؟ آپ صلی اللہ علیہ وسلم نے فرمایا : ” اسلام یہ ہے کہ تم اللہ کی عبادت کرو اور اس کے ساتھ کسی کو شریک نہ ٹھہراؤ ، نماز ادا کرو ، زکاۃ دو ، بیت اللہ کا حج کرو اور رمضان کے روزے رکھو “ ۔ وہ بولا : جب میں ایسا کرنے لگوں تو کیا میں مسلمان ہو گیا ؟ آپ صلی اللہ علیہ وسلم نے فرمایا : ” ہاں “ ، اس نے کہا : آپ نے سچ کہا ۔ جب ہم نے اس شخص کی یہ بات سنی کہ ” آپ نے سچ کہا “ تو ہمیں عجیب لگا ( خود ہی سوال بھی کرتا ہے اور جواب کی تصدیق بھی ) ۔ وہ بولا : محمد ! مجھے بتائیے ، ایمان کیا ہے ؟ آپ صلی اللہ علیہ وسلم نے فرمایا : ” اللہ پر ، اس کے فرشتوں پر ، کتاب پر ، نبیوں پر ایمان رکھنا اور تقدیر پر ایمان لانا “ ، وہ بولا : کیا اگر میں نے یہ سب کر لیا تو میں مومن ہو گیا ؟ رسول اللہ صلی اللہ علیہ وسلم نے فرمایا : ” ہاں “ ، وہ بولا : آپ نے سچ کہا ۔ پھر بولا : محمد ! مجھے بتائیے ، احسان کیا ہے ؟ آپ صلی اللہ علیہ وسلم نے فرمایا : ” یہ کہ تم اللہ کی عبادت اس طرح کرو گویا تم اسے دیکھ رہے ہو ، اور اگر تم اسے نہیں دیکھ رہے ہو تو وہ تمہیں دیکھ رہا ہے “ ۔ وہ بولا : آپ نے سچ کہا ۔ پھر بولا : محمد ! مجھے بتائیے کہ قیامت کب آئے گی ؟ یہ سن کر آپ نے اپنا سر جھکا لیا اور اسے کوئی جواب نہیں دیا ۔ اس نے سوال دہرایا تو آپ نے اسے کوئی جواب نہ دیا ، اس نے پھر سوال دہرایا تو آپ نے اسے کوئی جواب نہ دیا پھر آپ صلی اللہ علیہ وسلم نے اپنا سر اٹھایا اور فرمایا : ” جس سے سوال کیا جا رہا ہے وہ قیامت کے آنے کے متعلق سوال کرنے والے سے زیادہ نہیں جانتا ۔ البتہ اس کی کچھ نشانیاں ہیں جن سے تم جان سکتے ہو : جب تم دیکھو کہ جانوروں کو چرانے والے بڑی بڑی عمارتیں بنا رہے ہیں اور دیکھو کہ ننگے پاؤں ، ننگے بدن پھرنے والے زمین کے بادشاہ ہو رہے ہیں ، اور دیکھو کہ غلام عورت اپنے مالک کو جنم دے رہی ہے ( تو سمجھ لو کہ قیامت نزدیک ہے ) ، پانچ چیزیں ایسی ہیں جنہیں اللہ کے سوا کوئی نہیں جانتا ، پھر آپ نے «إن اللہ عنده علم الساعة» ” اللہ ہی کے پاس قیامت کا علم ہے “ ( سورة لقمان : 34 ) سے لے کر «إن اللہ عليم خبير» ” اللہ علیم ( ہر چیز کا جاننے والا ) اور خبیر ( ہر چیز کی خبر رکھنے والا ) ہے “ کی تلاوت کی ، پھر فرمایا : نہیں ، اس ذات کی قسم ! جس نے محمد کو حق کے ساتھ ہادی و بشارت دینے والا بنا کر بھیجا ، میں اس کو تم میں سے کسی شخص سے زیادہ نہیں جانتا ، وہ جبرائیل علیہ السلام تھے جو دحیہ کلبی کی شکل میں آئے تھے ۔ [سنن نسائي/حدیث: 4994]

سعد بن ابی وقاص رضی اللہ عنہ کہتے ہیں کہ نبی اکرم صلی اللہ علیہ وسلم نے کچھ لوگوں کو عطیہ دیا اور ان میں سے ایک شخص کو کچھ نہیں دیا ، سعد رضی اللہ عنہ نے کہا : اللہ کے رسول ! آپ نے فلاں فلاں کو دیا اور فلاں کو کچھ نہیں دیا حالانکہ وہ مومن ہے ؟ تو نبی آپ نے فرمایا : ” بلکہ وہ مسلم ہے “ ۱؎ ، سعد رضی اللہ عنہ نے تین بار دہرایا ( یعنی وہ مومن ہے ) اور نبی اکرم صلی اللہ علیہ وسلم ( ہر بار ) کہتے رہے : ” وہ مسلم ہے “ ، پھر نبی اکرم صلی اللہ علیہ وسلم نے فرمایا : ” میں بعض لوگوں کو عطیہ دیتا ہوں اور بعض ایسے لوگوں کو محروم کر دیتا ہوں جو مجھے ان سے زیادہ محبوب ہیں ، میں اسے اس اندیشے سے انہیں دیتا ہوں کہ کہیں وہ اپنے چہروں کے بل جہنم میں نہ ڈال دیئے جائیں “ ۲؎ ۔ [سنن نسائي/حدیث: 4995]

سعد رضی اللہ عنہ سے روایت ہے کہ رسول اللہ صلی اللہ علیہ وسلم نے مال تقسیم کیا تو کچھ لوگوں کو دیا اور کچھ لوگوں کو نہیں دیا ، میں نے عرض کیا : اللہ کے رسول ! آپ نے فلاں فلاں کو دیا اور فلاں کو نہیں دیا حالانکہ وہ مومن ہے ۔ آپ نے فرمایا : ” مومن نہ کہو ، مسلم کہو “ ۔ ابن شہاب زہری نے یہ آیت پڑھی : «قالت الأعراب آمنا» ۔ [سنن نسائي/حدیث: 4996]

بشر بن سحیم رضی اللہ عنہ سے روایت ہے کہ نبی اکرم صلی اللہ علیہ وسلم نے انہیں حکم دیا کہ ایام تشریق ( ۱۰ ، ۱۱ ، ۱۲ ، ۱۳ ذی الحجہ ) میں اعلان کر دیں کہ جنت میں مومن کے سوا کوئی نہیں داخل ہو گا ۱؎ ، اور یہ کہ یہ کھانے پینے کے دن ہیں ۲؎ ۔ [سنن نسائي/حدیث: 4997]

ابوہریرہ رضی اللہ عنہ روایت کرتے ہیں کہ رسول اللہ صلی اللہ علیہ وسلم نے فرمایا : ” مسلمان وہ ہے ، جس کی زبان اور ہاتھ سے لوگ محفوظ ہوں ، اور مومن وہ ہے جس سے لوگ اپنی جان و مال کے بارے میں اطمینان رکھیں “ ۱؎ ۔ [سنن نسائي/حدیث: 4998]

عبداللہ بن عمرو رضی اللہ عنہما کہتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا : ” ( حقیقی اور کامل ) مسلمان وہ ہے جس کی زبان اور جس کے ہاتھ سے مسلمان محفوظ رہیں ، اور ( حقیقی ) مہاجر وہ ہے جو اللہ تعالیٰ کی منع کی ہوئی چیزوں کو چھوڑ دے “ ۔ [سنن نسائي/حدیث: 4999]

انس رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” جو ہمارے جیسی نماز پڑھے ، ہمارے قبلے کی طرف رخ کرے اور ہمارا ذبیحہ کھائے تو وہ مسلمان ہے “ ۱؎ ۔ [سنن نسائي/حدیث: 5000]

ابو سعید خدری رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” جب کوئی بندہ اسلام قبول کر لے اور اچھی طرح مسلمان ہو جائے تو اللہ تعالیٰ اس کی ہر نیکی لکھ لیتا ہے جو اس نے کی ہو اور اس کی ہر برائی مٹا دی جاتی ہے جو اس نے کی ہو ، پھر اس کے بعد یوں ہوتا ہے کہ بھلائی کا بدلہ اس کے دس گنا سے لے کر سات سو گنا تک ہوتا ہے ، اور برائی کا بدلہ اتنا ہی ہوتا ہے “ ( جتنی اس نے کی ) سوائے اس کے کہ اللہ معاف ہی کر دے ( تو کچھ بھی نہیں ہوتا ) ۔ [سنن نسائي/حدیث: 5001]

ابوموسیٰ اشعری رضی اللہ عنہ کہتے ہیں کہ میں نے عرض کیا : اللہ کے رسول ! کون سا اسلام بہتر ہے ؟ آپ نے فرمایا : ” جس کی زبان اور جس کے ہاتھ سے مسلمان محفوظ رہیں “ ۲؎ ۔ [سنن نسائي/حدیث: 5002]

عبداللہ بن عمرو رضی اللہ عنہما سے روایت ہے کہ ایک شخص نے رسول اللہ صلی اللہ علیہ وسلم سے پوچھا : کون سا اسلام سب سے اچھا ہے ؟ آپ نے فرمایا : ” کھانا کھلانا ، سلام کرنا ہر شخص کو خواہ جان پہچان کا ہو یا نہ ہو “ ۔ [سنن نسائي/حدیث: 5003]

عبداللہ بن عمر رضی اللہ عنہما سے روایت ہے کہ ایک شخص نے ان سے کہا : کیا آپ جہاد نہیں کریں گے ؟ انہوں نے کہا : میں نے رسول اللہ صلی اللہ علیہ وسلم کو فرماتے ہوئے سنا ہے : ” اسلام کی بنیاد پانچ چیزوں پر ہے : یہ گواہی دینا کہ اللہ کے سوا کوئی حقیقی معبود نہیں ، اور نماز قائم کرنا ، زکاۃ دینی ، حج کرنا ، اور رمضان کے روزے رکھنا “ ۱؎ ۔ [سنن نسائي/حدیث: 5004]

عبادہ بن صامت رضی اللہ عنہ کہتے ہیں کہ ہم لوگ ایک مجلس میں نبی اکرم صلی اللہ علیہ وسلم کے پاس تھے تو آپ نے فرمایا : ” تم لوگ مجھ سے اس بات پر بیعت کرو کہ اللہ تعالیٰ کے ساتھ کسی کو شریک نہ کرو گے ، نہ چوری کرو گے ، نہ زنا کرو گے “ ، پھر آپ نے سورۃ الممتحنہ کی آیت پڑھی ۱؎ پھر فرمایا : ” تم میں سے جو اپنے اقرار کو پورا کرے گا تو اس کا ثواب اللہ تعالیٰ کے پاس ہے ، اور جو ان میں سے کوئی کام کرے گا پھر اللہ تعالیٰ اسے چھپا لے تو اب یہ اللہ تعالیٰ پر ہے کہ چاہے تو سزا دے اور چاہے تو معاف کر دے “ ۔ [سنن نسائي/حدیث: 5005]

انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : ” مجھے حکم دیا گیا ہے کہ میں لوگوں سے جنگ کروں یہاں تک کہ وہ گواہی دیں کہ اللہ کے سوا کوئی معبود برحق نہیں اور یہ کہ محمد اللہ کے رسول ہیں ، پھر جب وہ گواہی دیں کہ اللہ تعالیٰ کے سوا کوئی معبود برحق نہیں اور یہ کہ محمد اللہ کے رسول ہیں اور ہمارے قبلے کی طرف رخ کریں ، ہمارا ذبیحہ کھائیں اور ہماری نماز پڑھیں تو ان کے خون اور ان کے مال ہم پر حرام ہو گئے مگر کسی حق کے بدلے ، ان کے لیے وہ سب ہے جو مسلمانوں کے لیے ہے اور ان پر وہ سب ہے جو مسلمانوں پر ہے ۔ [سنن نسائي/حدیث: 5006]

ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا : ” ایمان کی ستر سے زائد شاخیں ہیں ، حیاء ( شرم ) بھی ایمان کی ایک شاخ ہے “ ۱؎ ۔ [سنن نسائي/حدیث: 5007]

ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” ایمان کی ستر سے زائد شاخیں ہیں ، ان میں سب سے سب سے بہتر لا الٰہ الا اللہ اور سب سے کم تر راستے سے تکلیف دہ چیز ہٹانا ہے ، اور حیاء ( شرم ) بھی ایمان کی ایک شاخ ہے “ ۔ [سنن نسائي/حدیث: 5008]

ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے فرمایا : ” حیاء ( شرم ) ایمان کی ایک شاخ ہے “ ۔ [سنن نسائي/حدیث: 5009]

نبی اکرم صلی اللہ علیہ وسلم کے ایک صحابی کہتے ہیں کہ رسول اللہ صلی اللہ علیہ وسلم نے فرمایا : ” عمار کا ایمان ہڈیوں کے پوروں تک بھر گیا ہے “ ۱؎ ۔ [سنن نسائي/حدیث: 5010]

ابو سعید خدری رضی اللہ عنہ کہتے ہیں کہ میں نے رسول اللہ صلی اللہ علیہ وسلم کو سنا ، آپ نے فرمایا : ” تم میں سے کوئی جب بری بات دیکھے تو چاہیئے کہ اسے اپنے ہاتھ کے ذریعہ دور کر دے ، اگر اس کی طاقت نہ ہو تو اپنی زبان سے اور اگر اس کی طاقت نہ ہو تو اپنے دل کے ذریعہ اس کو دور کر دے ، یہ ایمان کا سب سے کمتر درجہ ہے “ ۱؎ ۔ [سنن نسائي/حدیث: 5011]

ابو سعید خدری رضی اللہ عنہ کہتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا : ” جس کسی نے برائی دیکھی پھر اسے اپنے ہاتھ سے دور کر دیا تو وہ بری ہو گیا ، اور جس میں ہاتھ سے دور کرنے کی طاقت نہ ہو اور اس نے زبان سے دور کر دی ہو تو وہ بھی بری ہو گیا ، اور جس میں اسے زبان سے بھی دور کرنے کی طاقت نہ ہو اور اس نے اسے دل سے دور کیا ۱؎ تو وہ بھی بری ہو گیا اور یہ ایمان کا سب سے ادنیٰ درجہ ہے “ ۔ [سنن نسائي/حدیث: 5012]

ابو سعید خدری رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” تم میں سے کسی کا دنیاوی حق کے سلسلے میں جھگڑا اس جھگڑے سے زیادہ سخت نہیں جو مومن اپنے رب سے اپنے ان بھائیوں کے سلسلے میں کریں گے جو جہنم میں داخل کر دیے گئے ہوں گے ، وہ کہیں گے : ہمارے رب ! ہمارے بھائی ہمارے ساتھ نماز ادا کرتے تھے ، ہمارے ساتھ روزے رکھتے تھے ، ہمارے ساتھ حج کرتے تھے پھر بھی تو نے انہیں جہنم میں ڈال دیا ۔ وہ کہے گا : جاؤ اور ان میں سے جنہیں تم جانتے ہو نکال لو ، چنانچہ وہ ان کے پاس آئیں گے اور انہیں ان کی شکلوں سے پہچان لیں گے ، ان میں سے بعض ایسے ہوں گے جو آدھی پنڈلی تک جلے ہوئے ہوں گے اور بعض ایسے کہ ٹخنوں تک جلے ہوں گے ، چنانچہ وہ انہیں نکالیں گے تو وہ کہیں گے : ہمارے رب ! جنہیں نکالنے کا تو نے ہمیں حکم دیا تھا ہم نے انہیں نکال لیا ، وہ کہے گا : جس کے دل میں ایک دینار برابر ایمان ہو اسے بھی نکال لو ، پھر کہے گا : جس کے دل میں آدھا دینار برابر ایمان ہو یہاں تک کہ کہے گا : جس کے دل میں ذرے کے وزن بھر ایمان ہو “ ۔ ابو سعید خدری کہتے ہیں : جسے یقین نہ ہو تو وہ یہ آیت : «إن اللہ لا يغفر أن يشرك به ويغفر ما دون ذلك لمن يشائ» سے «عظيما» ” یقیناً اللہ تعالیٰ اپنے ساتھ شریک کئے جانے کو نہیں بخشتا اور اس کے علاوہ جسے چاہے بخش دیتا ہے ، اور جو اللہ تعالیٰ کے ساتھ شریک مقرر کرے اس نے بہت بڑا گناہ اور بہتان باندھا “ ( النساء : ۴۸ ) تک پڑھے ۔ [سنن نسائي/حدیث: 5013]

ابو سعید خدری رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” ایک مرتبہ میں سو رہا تھا کہ اسی دوران میں نے خواب دیکھا کہ لوگ مجھ پر پیش کئے جا رہے ہیں اور وہ قمیص پہنے ہوئے ہیں ، بعض کی قمیص چھاتی تک ہے ، بعض کی اس سے نیچے ہے اور میرے سامنے عمر بن خطاب کو پیش کیا گیا ، وہ ایسی قمیص پہنے ہوئے تھے جسے وہ گھسیٹ رہے تھے “ ۔ لوگوں نے عرض کیا : اللہ کے رسول ! اس کی تعبیر کیا ہے ؟ آپ نے فرمایا : ” دین “ ۱؎ ۔ [سنن نسائي/حدیث: 5014]

طارق بن شہاب کہتے ہیں کہ یہود کا ایک یہودی عمر بن خطاب رضی اللہ عنہ کے پاس آ کر بولا : امیر المؤمنین ! آپ کی کتاب ( قرآن ) میں ایک آیت ہے ، اگر وہ ہم یہودیوں پر اترتی تو ( جس روز اترتی ) ہم اسے عید کا دن بنا لیتے ، کہا : کون سی آیت ؟ یہودی بولا : «اليوم أكملت لكم دينكم وأتممت عليكم نعمتي ورضيت لكم الإسلام دينا» ” آج کے دن میں نے تمہارا دین پورا کر دیا ، تم پر اپنی نعمت پوری کر دی اور تمہارے لیے دین اسلام کو پسند کیا “ ( المائدہ : ۳ ) ۔ عمر رضی اللہ عنہ نے کہا : مجھے وہ مقام جہاں یہ اتری وہ مقام معلوم ہے ، وہ دن معلوم ہے جب یہ نازل ہوئی ، یہ جمعہ کے دن عرفات میں رسول اللہ صلی اللہ علیہ وسلم پر نازل ہوئی ۔ [سنن نسائي/حدیث: 5015]

انس رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” تم میں سے کوئی مومن نہیں ہو سکتا جب تک کہ میں اس کے اپنے بال بچوں ، اس کے ماں باپ اور تمام لوگوں سے زیادہ اسے محبوب نہ ہو جاؤں “ ۱؎ ۔ [سنن نسائي/حدیث: 5016]

انس رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” تم میں سے کوئی مومن نہیں ہو سکتا جب تک کہ میں اس کے بیوی بچوں ، اس کے مال اور تمام لوگوں سے زیادہ اسے محبوب نہ ہو جاؤں “ ۔ [سنن نسائي/حدیث: 5017]

ابوہریرہ رضی اللہ عنہ روایت کرتے ہیں کہ رسول اللہ صلی اللہ علیہ وسلم نے فرمایا : ” اس ذات کی قسم ، جس کے ہاتھ میں میری جان ہے ! تم میں سے کوئی مومن نہیں ہو سکتا جب تک کہ میں اس کے بال بچے اور اس کے ماں باپ سے زیادہ اسے محبوب نہ ہو جاؤں “ ۔ [سنن نسائي/حدیث: 5018]

انس رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” تم میں سے کوئی مومن نہیں ہو سکتا جب تک کہ وہ اپنے بھائی کے لیے وہی پسند نہ کرے جو اپنے لیے پسند کرتا ہے “ ۔ [سنن نسائي/حدیث: 5019]

انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : ” اس ذات کی قسم ، جس کے ہاتھ میں محمد صلی اللہ علیہ وسلم کی جان ہے ! تم میں سے کوئی مومن نہیں ہو سکتا جب تک کہ اپنے بھائی کے لیے وہی بھلائی نہ چاہے جو اپنے لیے چاہتا ہے “ ۔ [سنن نسائي/حدیث: 5020]

علی رضی اللہ عنہ کہتے ہیں کہ نبی امّی صلی اللہ علیہ وسلم نے سے مجھ سے عہد کیا کہ ” تم سے صرف مومن ہی محبت کرے گا ، اور تم سے صرف منافق ہی بغض رکھے اور نفرت کرے گا “ ۔ [سنن نسائي/حدیث: 5021]

انس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے فرمایا : ” انصار سے محبت ایمان کی نشانی ہے ، اور انصار سے نفرت نفاق کی نشانی ہے “ ۔ [سنن نسائي/حدیث: 5022]

عبداللہ بن عمرو رضی اللہ عنہما سے روایت ہے کہ نبی اکرم صلی اللہ علیہ وسلم نے فرمایا : ” جس میں چار چیزیں ہوں ، وہ منافق ہے ، یا ان چار میں سے کوئی ایک خصلت ( عادت ) ہو تو اس میں نفاق کی ایک خصلت ہے جب تک کہ وہ اسے چھوڑ نہ دے : جب بات کرے تو جھوٹ بولے ، وعدہ کرے تو وعدہ خلافی کرے ، عہد و پیمان کرے تو توڑ دے ، اور جب جھگڑا کرے تو گالی گلوچ کرے “ ۔ [سنن نسائي/حدیث: 5023]

ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : ” نفاق کی تین علامتیں ( نشانیاں ) ہیں : جب بات کرے تو جھوٹ بولے ، جب وعدہ کرے تو وعدہ خلافی کرے اور جب امین بنایا جائے تو خیانت کرے “ ۔ [سنن نسائي/حدیث: 5024]

علی رضی اللہ عنہ کہتے ہیں کہ مجھ سے رسول اللہ صلی اللہ علیہ وسلم نے عہد کیا کہ ” مجھ سے محبت صرف مومن کرے گا ، اور مجھ سے بغض و نفرت صرف منافق کرے گا “ ۔ [سنن نسائي/حدیث: 5025]

عبداللہ بن مسعود رضی اللہ عنہ کہتے ہیں کہ تین باتیں جس شخص میں ہوں ، وہ منافق ہے : جب بات چیت کرے تو جھوٹ بولے ، جب امین بنایا جائے تو خیانت کرے ، جب وعدہ کرے تو وعدہ خلافی کرے ، اور جس شخص میں ان میں سے کوئی ایک عادت ہو تو اس میں نفاق کی ایک عادت ہے یہاں تک کہ وہ اسے چھوڑ دے ۔ [سنن نسائي/حدیث: 5026]

ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا : ” جس نے ایمان کے ساتھ ثواب کی نیت سے رمضان میں قیام کیا ( یعنی تراویح پڑھی ) کی تو اس کے تمام گزرے ہوئے گناہ معاف کر دئیے جائیں گے “ ۔ [سنن نسائي/حدیث: 5027]

ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا : ” جو شخص رمضان کے مہینے میں ایمان کے ساتھ اور ثواب کی نیت سے تراویح پڑھے تو اس کے تمام گزرے ہوئے گناہ معاف کر دئیے جائیں گے “ ۔ [سنن نسائي/حدیث: 5028]

ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا : ” جس نے رمضان کے مہینے میں ایمان کے ساتھ ثواب کی نیت سے تراویح پڑھی تو اس کے تمام گزرے ہوئے گناہ معاف کر دئیے جائیں گے “ ۔ [سنن نسائي/حدیث: 5029]

ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا : ” جس نے رمضان میں ایمان کے ساتھ اور ثواب کی نیت سے نماز تہجد پڑھی تو اس کے گزرے ہوئے تمام گناہ معاف کر دیے جائیں گے ۔ اور جس نے ایمان کے ساتھ ثواب کی نیت سے شب قدر میں قیام کیا ، اس کے بھی گزرے ہوئے تمام گناہ معاف کر دیے جائیں گے “ ۔ [سنن نسائي/حدیث: 5030]

طلحہ بن عبیداللہ رضی اللہ عنہ سے روایت ہے کہ اہل نجد میں سے ایک شخص رسول اللہ صلی اللہ علیہ وسلم کے پاس آیا ، جس کے بال بکھرے ہوئے تھے ، اس کی گنگناہٹ سنائی دیتی تھی لیکن سمجھ میں نہیں آتا تھا کہ وہ کیا کہہ رہا ہے ۔ جب وہ قریب ہوا تو معلوم ہوا کہ وہ اسلام کے بارے میں پوچھ رہا ہے ۔ رسول اللہ صلی اللہ علیہ وسلم نے اس سے فرمایا : ” دن رات میں پانچ وقت کی نماز “ ، اس نے کہا : اس کے علاوہ کچھ اور بھی ہیں میرے اوپر ؟ آپ نے فرمایا : ” نہیں ، سوائے اس کے کہ تم نفل ( سنت ) پڑھنا چاہو “ ، رسول اللہ صلی اللہ علیہ وسلم نے فرمایا : ” رمضان کے مہینے کے روزے “ ، اس نے کہا : میرے اوپر اس کے علاوہ کچھ اور بھی روزے ہیں ؟ آپ نے فرمایا : ” نہیں ، سوائے اس کے کہ تم نفل ادا کرو “ ، اور پھر رسول اللہ صلی اللہ علیہ وسلم نے اس سے زکاۃ کا ذکر کیا ۔ اس نے کہا : میرے اوپر اس کے علاوہ بھی ہے ؟ آپ نے فرمایا : ” نہیں سوائے اس کے کہ تم نفل دینا چاہو “ ، پھر وہ منہ موڑ کر چلا اور کہہ رہا تھا : نہ اس سے زیادہ کروں گا اور نہ اس سے کم کروں گا ، رسول اللہ صلی اللہ علیہ وسلم نے فرمایا : ” اگر اس نے سچ کہا ہے تو وہ کامیاب ہوا “ ۔ [سنن نسائي/حدیث: 5031]

ابوہریرہ رضی اللہ عنہ کہتے ہیں کہ میں نے رسول اللہ صلی اللہ علیہ وسلم کو فرماتے ہوئے سنا : ” اللہ تعالیٰ نے ایسے شخص کو جو اس کی راہ میں نکلتا ہے ( یعنی جہاد کے لیے ) اور اس کا یہ نکلنا صرف اللہ پر اپنے ایمان کے تقاضے اور اس کی راہ میں جہاد کے جذبے سے ہے ( تو اللہ نے ایسے شخص کی ) ضمانت اپنے ذمہ لے لی ہے کہ میں اسے جنت میں داخل کروں گا چاہے وہ قتل ہو کر مرا ہو ، یا اپنی طبعی موت پائی ہو ، یا میں اسے اس اجر و ثواب اور مال غنیمت کے ساتھ جو اسے ملا ہو اور جو بھی ملا ہو ، اس کے اپنے اس گھر پر واپس پہنچا دوں گا جہاں سے وہ جہاد کے لیے نکلا تھا “ ۔ [سنن نسائي/حدیث: 5032]

ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” اللہ تعالیٰ نے ضمانت لی ہے اس شخص کی جو اس کے راستے میں نکلا ہو اور اس کا یہ نکلنا جہاد کے مقصد سے ، اللہ پر ایمان اور اس کے رسولوں کی تصدیق کی وجہ سے ہو تو وہ ضامن ہے اس کا کہ اسے جنت میں داخل کرے یا اسے اس کے وطن لوٹا دے جہاں سے وہ نکلا تھا اس اجر یا مال غنیمت کے ساتھ جو اسے ملا ہو جو بھی ملا ہو “ ۔ [سنن نسائي/حدیث: 5033]

عبداللہ بن عباس رضی اللہ عنہما کہتے ہیں کہ رسول اللہ صلی اللہ علیہ وسلم کے پاس بنی عبدقیس کا وفد آیا ، تو ان لوگوں بت کہا : ہم لوگ قبیلہ ربیعہ سے ہیں ، ہم آپ تک حرمت والے مہینوں کے علاوہ کبھی نہیں آ سکتے تو آپ ہمیں کچھ باتوں کا حکم دیجئیے جو ہم آپ سے سیکھیں اور جو ہمارے پیچھے رہ گئے ہیں اسے ان تک پہنچا سکیں ، آپ صلی اللہ علیہ وسلم نے فرمایا : ” میں تمہیں چار باتوں کا حکم دیتا ہوں اور چار باتوں سے روکتا ہوں : اللہ پر ایمان -پھر آپ نے اس کی تشریح کی کہ ایک تو گواہی دینا کہ اللہ کے سوا کوئی معبود برحق نہیں اور میں اللہ کا رسول ہوں - دوسرے نماز قائم کرنا ، تیسرے زکاۃ کی ادائیگی ، چوتھے یہ کہ مال غنیمت کا پانچواں ( خمس ) مجھے لا کر دینا ، اور میں تمہیں روکتا ہوں : ( تمبی ) کدو کے بنے پیالے ، لاکھی ( سبز رنگ ) کے برتنوں ، لکڑی کے برتنوں اور تار کول ملے ہوئے برتنوں کے استعمال سے “ ۱؎ ۔ [سنن نسائي/حدیث: 5034]

ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا : ” جو کسی مسلمان کے جنازے کے پیچھے جائے ایمان کے ساتھ ثواب کی نیت سے ، اس کی نماز جنازہ ادا کرے پھر قبر میں رکھے جانے تک انتظار کرے تو اس کے لیے دو قیراط ثواب ہے ، ایک قیراط جبل احد کی طرح ہو گا ، اور جس نے اس کی نماز جنازہ پڑھی اور لوٹ آیا تو اسے صرف ایک قیراط ثواب ملے گا “ ۔ [سنن نسائي/حدیث: 5035]

عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم کا ایک شخص کے پاس سے گزر ہوا ، جو اپنے بھائی کو شرم و حیاء کے بارے میں نصیحت کر رہا تھا ، آپ نے فرمایا : ” اس کو چھوڑ دو ، ( یعنی اس کو یہ نصیحت کرنی چھوڑ دو ) شرم و حیاء تو ایمان میں داخل ہے “ ۔ [سنن نسائي/حدیث: 5036]

ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” یہ دین آسان ہے اور جو دین میں ( عملی طور پر ) سختی برتے گا تو دین اس پر غالب آ جائے گا ( اور اسے تھکا دے گا ) لہٰذا صحیح راستے پر چلو ( اگر مکمل طور سے عمل نہ کر سکو تو کم از کم ) دین سے قریب رہو ، لوگوں کو دین کے معاملے میں خوش رکھو ( نفرت نہ پیدا کرو ) انہیں آسانی دو اور صبح و شام اور کچھ رات گئے کی مدد سے اللہ کی عبادت کرو ۱؎ ۔ [سنن نسائي/حدیث: 5037]

ام المؤمنین عائشہ رضی اللہ عنہا سے روایت ہے کہ نبی اکرم صلی اللہ علیہ وسلم ان کے پاس آئے ، ان کے پاس ایک عورت تھی ، آپ نے فرمایا : ” یہ کون ہے ؟ “ کہا : فلانی ہے ، یہ سوتی نہیں ، اور وہ اس کی نماز کا تذکرہ کرنے لگیں ، آپ نے فرمایا : ” ایسا مت کرو ، تم اتنا ہی کرو جتنے کی تم میں سکت اور طاقت ہو ، اللہ کی قسم ! اللہ ( ثواب دینے سے ) نہیں تھکتا ، لیکن تم ( عمل کرتے کرتے ) تھک جاؤ گے اسے تو وہ دینی عمل سب سے زیادہ پسند ہے جسے آدمی پابندی سے کرے “ ۔ [سنن نسائي/حدیث: 5038]

ابو سعید خدری رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” وہ زمانہ قریب ہے جب مسلمان کا بہترین مال بکریاں ہوں گی ، جنہیں لے کر وہ پہاڑوں کی چوٹیوں اور بارش ہونے کی جگہوں میں چلا جائے گا ، وہ اس طرح فتنوں سے اپنے دین کو بچائے گا “ ۔ [سنن نسائي/حدیث: 5039]

عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا : ” منافق کی مثال اس بکری کی طرح ہے جو دو ریوڑوں میں چل رہی ہو ، کبھی وہ ادھر جاتی ہے اور کبھی ادھر ، وہ نہیں سمجھ پاتی کہ کس ریوڑ کے ساتھ چلے “ ۔ [سنن نسائي/حدیث: 5040]

ابوموسیٰ اشعری رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” اس مومن کی مثال جو قرآن پڑھتا ہے سنترے کی سی ہے کہ اس کا مزہ بھی اچھا ہے اور بو بھی اچھی ہے ، اور اس مومن کی مثال جو قرآن نہیں پڑھتا کھجور کے مانند ہے کہ اس کا مزہ اچھا ہے لیکن کوئی بو نہیں ہے ، اور اس منافق کی مثال جو قرآن پڑھتا ہے ریحانہ ( خوشبودار گھاس وغیرہ ) کی سی ہے کہ اس کی بو اچھی ہے لیکن مزہ کڑوا ہے ، اور اس منافق کی مثال جو قرآن نہیں پڑھتا تھوہڑ ( اندرائن ) جیسی ہے کہ اس کا مزہ کڑوا ہے اور اس میں کوئی خوشبو بھی نہیں “ ۔ [سنن نسائي/حدیث: 5041]

انس بن مالک رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا : ” تم میں سے کوئی مومن نہیں ہو سکتا جب تک کہ وہ اپنے بھائی کے لیے وہی پسند نہ کرے جو اپنے لیے پسند کرتا ہے “ ۔ [سنن نسائي/حدیث: 5042]