کتاب: غلام کی آ زادی کے احکام و مسائل

جابر رضی اللہ عنہ سے روایت ہے کہ رسول اللہ صلی اللہ علیہ وسلم نے مدبر غلام بیچا ۱؎ ۔ [سنن ابن ماجه/حدیث: 2512]

جابر بن عبداللہ رضی اللہ عنہما کہتے ہیں کہ ہم میں سے ایک شخص نے غلام کو مدبر بنا دیا ، اس کے پاس اس کے علاوہ اور کوئی مال نہ تھا تو نبی اکرم صلی اللہ علیہ وسلم نے اسے بیچ دیا ، اور قبیلہ بنی عدی کے شخص ابن نحام نے اسے خریدا ۔ [سنن ابن ماجه/حدیث: 2513]

عبداللہ بن عمر رضی اللہ عنہما کہتے ہیں کہ نبی اکرم صلی اللہ علیہ وسلم نے فرمایا : ” مدبر غلام میت کے تہائی مال میں سے شمار ہو گا “ ۔ ابن ماجہ کہتے ہیں : میں نے عثمان یعنی ابن ابی شیبہ کو کہتے سنا کہ یہ روایت یعنی «المدبر من الثلث» کی حدیث صحیح نہیں ہے ۔ ابوعبداللہ ابن ماجہ کہتے ہیں : اس کی کوئی اصل نہیں ہے ۔ [سنن ابن ماجه/حدیث: 2514]

عبداللہ بن عباس رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا : ” جو لونڈی اپنے مالک کا بچہ جنے ، تو وہ مالک کے مر جانے کے بعد آزاد ہو جائے گی “ ۔ [سنن ابن ماجه/حدیث: 2515]

عبداللہ بن عباس رضی اللہ عنہما کہتے ہیں کہ رسول اللہ صلی اللہ علیہ وسلم کے بیٹے ابراہیم کی ماں کا تذکرہ رسول اللہ صلی اللہ علیہ وسلم کے پاس کیا گیا تو آپ صلی اللہ علیہ وسلم نے فرمایا : ” اس کے بچے ( ابراہیم ) نے اسے آزاد کر دیا “ ۔ [سنن ابن ماجه/حدیث: 2516]

جابر بن عبداللہ رضی اللہ عنہما کہتے ہیں کہ ہم لوگ اپنی لونڈیاں اور «امہات الاولاد» بیچا کرتے تھے ، اور نبی اکرم صلی اللہ علیہ وسلم ہمارے درمیان زندہ تھے ، اور ہم اس میں کوئی حرج محسوس نہیں کرتے تھے ۱؎ ۔ [سنن ابن ماجه/حدیث: 2517]

ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” تین قسم کے لوگ ایسے ہیں جن میں سے ہر ایک کی مدد کرنا اللہ پر حق ہے ، ایک وہ جو اللہ تعالیٰ کی راہ کا غازی ہو ، دوسرے وہ مکاتب جو بدل کتابت ادا کرنے کا ارادہ رکھتا ہو ، تیسرا وہ شخص جو پاک دامن رہنے کے ارادے سے نکاح کرے “ ۱؎ ۔ [سنن ابن ماجه/حدیث: 2518]

عبداللہ بن عمرو بن العاص رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا : ” جس غلام سے سو اوقیہ پر مکاتبت کی گئی ہو ، اور وہ سوائے دس اوقیہ کے باقی تمام ادا کر دے ، تو وہ غلام ہی رہے گا “ ( جب تک پورا ادا نہ کر دے ) ۱؎ ۔ [سنن ابن ماجه/حدیث: 2519]

ام المؤمنین ام سلمہ رضی اللہ عنہا کہتی ہیں کہ نبی اکرم صلی اللہ علیہ وسلم نے فرمایا : ” اگر تم میں سے کسی کے پاس مکاتب غلام ہو ، اور اس کے پاس اس قدر مال ہو گیا ہو کہ وہ اپنا بدل کتابت ادا کر سکے ، تو تم لوگوں کو اس سے پردہ کرنا چاہیئے “ ۔ [سنن ابن ماجه/حدیث: 2520]

ام المؤمنین عائشہ رضی اللہ عنہا سے روایت ہے کہ ان کے پاس بریرہ رضی اللہ عنہا آئیں جو مکاتب ( لونڈی ) تھیں ، ان کے مالکوں نے نو اوقیہ پر ان سے مکاتبت کی تھی ، عائشہ رضی اللہ عنہا نے ان سے کہا : اگر تمہارے مالک چاہیں تو تمہارا بدل مکاتبت میں ایک ہی بار ادا کروں ، مگر تمہاری ولاء ( میراث ) میری ہو گی ، چنانچہ بریرہ رضی اللہ عنہا اپنے مالکوں کے پاس آئیں ، اور ان سے اس کا تذکرہ کیا تو انہوں نے یہ ( پیش کش ) اس شرط پر منظور کر لی کہ ولاء ( میراث ) کا حق خود ان کو ملے گا ، اس کا تذکرہ عائشہ رضی اللہ عنہا نے نبی اکرم صلی اللہ علیہ وسلم سے کیا ، تو آپ صلی اللہ علیہ وسلم نے فرمایا : ” تم اپنا کام کر ڈالو “ ، اور پھر آپ نے کھڑے ہو کر لوگوں میں خطبہ دیا ، اور اللہ تعالیٰ کی حمد و ثنا بیان کر کے فرمایا : ” آخر لوگوں کو کیا ہو گیا ہے کہ وہ ایسی شرطیں لگاتے ہیں جو اللہ تعالیٰ کی کتاب میں نہیں ہیں ، اور ہر وہ شرط جو اللہ تعالیٰ کی کتاب میں نہ ہو باطل ہے ، اگرچہ ایسی سو شرطیں ہوں ، اللہ کی کتاب سب سے زیادہ حقدار اور اللہ تعالیٰ کی شرط سب سے زیادہ قوی ہے ، ولاء اسی کا حق ہے جو ( مکاتب کی طرف سے مال ادا کر کے ) اسے آزاد کرے “ ۔ [سنن ابن ماجه/حدیث: 2521]

شرحبیل بن سمط کہتے ہیں کہ میں نے کعب رضی اللہ عنہ سے کہا : کعب بن مرہ ! ہم سے رسول اللہ صلی اللہ علیہ وسلم کی حدیث بیان کریں ، اور احتیاط سے کام لیں ، انہوں نے کہا : میں نے رسول اللہ صلی اللہ علیہ وسلم کو فرماتے سنا : ” جو شخص کسی مسلمان کو آزاد کرے گا تو وہ اس کے لیے جہنم سے نجات کا ذریعہ ہو گا ، اس کی ہر ہڈی اس کی ہر ہڈی کا فدیہ بنے گی ، اور جو شخص دو مسلمان لونڈیوں کو آزاد کرے گا تو یہ دونوں اس کے لیے جہنم سے نجات کا ذریعہ بنیں گی ، ان کی دو ہڈیاں اس کی ایک ہڈی کے برابر ہوں گی “ ۔ [سنن ابن ماجه/حدیث: 2522]

ابوذر رضی اللہ عنہ کہتے ہیں کہ میں نے عرض کیا : اللہ کے رسول ! کون سا غلام آزاد کرنا سب سے زیادہ بہتر ہے ؟ آپ صلی اللہ علیہ وسلم نے فرمایا : ” جو مالکوں کو سب سے زیادہ پسند ہو ، اور جو قیمت کے اعتبار سے سب سے مہنگا ہو “ ۱؎ ۔ [سنن ابن ماجه/حدیث: 2523]

سمرہ بن جندب رضی اللہ عنہ کہتے ہیں کہ نبی اکرم صلی اللہ علیہ وسلم نے فرمایا : ” جو کسی محرم رشتے دار کا مالک بن جائے تو وہ آزاد ہے “ ۔ [سنن ابن ماجه/حدیث: 2524]

عبداللہ بن عمر رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا : ” جو کسی محرم رشتے دار کا مالک ہو جائے تو وہ آزاد ہے “ ۔ [سنن ابن ماجه/حدیث: 2525]

‏‏‏‏ - [سنن ابن ماجه/حدیث: 2526]

ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا : ” جو کوئی کسی ( مشترک ) غلام میں اپنا حصہ آزاد کر دے ، تو اس کی ذمہ داری ہے کہ اگر اس کے پاس مال ہو تو اپنے مال سے اس کو مکمل آزاد کرائے ، اور اگر اس کے پاس مال نہ ہو تو غلام سے باقی ماندہ قیمت کی ادائیگی کے لیے مزدوری کرائے ، لیکن اس پر طاقت سے زیادہ بوجھ نہ ڈالا جائے “ ۔ [سنن ابن ماجه/حدیث: 2527]

عبداللہ بن عمر رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا : ” جو شخص کسی غلام میں سے اپنے حصہ کو آزاد کر دے ، تو کسی عادل شخص سے غلام کی قیمت لگوائی جائے گی ، اور اس کے بقیہ شرکاء کے حصہ کی قیمت بھی اسے ادا کرنی ہو گی ، بشرطیکہ اس کے پاس اس قدر مال ہو جتنی غلام کی قیمت ہے ، اور اس طرح پورا غلام اس کی طرف سے آزاد ہو جائے گا ، لیکن اگر اس کے پاس مال نہ ہو تو ایسی صورت میں بس اسی قدر غلام آزاد ہو گا جتنا اس نے آزاد کر دیا “ ۔ [سنن ابن ماجه/حدیث: 2528]

عبداللہ بن عمر رضی اللہ عنہما کہتے ہیں کہ رسول اللہ صلی اللہ علیہ وسلم نے فرمایا : ” جو شخص کسی ایسے غلام کو آزاد کرے جس کے پاس مال ہو ، وہ مال غلام ہی کا ہو گا ، سوائے اس کے کہ مالک غلام سے اس کے مال کی شرط لگا لے تو وہ مال مالک کا ہو گا “ ۔ ابن لہیعہ کی روایت میں ( شرط کے بجائے ) «إلا أن يستثنيه السيد» ہے ( سوائے اس کے کہ مالک مال کا استثناء کر لے ) ۔ [سنن ابن ماجه/حدیث: 2529]

عمیر مولی عبداللہ بن مسعود رضی اللہ عنہ کہتے ہیں کہ ابن مسعود رضی اللہ عنہما نے ان سے کہا : عمیر ! میں نے تمہیں خوشی خوشی آزاد کر دیا ، میں نے رسول اللہ صلی اللہ علیہ وسلم کو فرماتے سنا ہے : ” جو شخص ایک غلام آزاد کرے اور اس کے مال کا تذکرہ نہ کرے ، تو وہ مال غلام کا ہو گا “ ، مجھے بتاؤ تمہارے پاس کیا مال ہے ؟ ۔ [سنن ابن ماجه/حدیث: 2530]

اس سند سے بھی اسی جیسی حدیث مروی ہے ۔ [سنن ابن ماجه/حدیث: 2530M]

نبی اکرم صلی اللہ علیہ وسلم کی لونڈی میمونہ بنت سعد رضی اللہ عنہا سے روایت ہے کہ رسول اللہ صلی اللہ علیہ وسلم سے ولد الزنا کے بارے میں سوال کیا گیا تو آپ صلی اللہ علیہ وسلم نے فرمایا : ” جوتیوں کی ایسی جوڑی جسے پہن کر جہاد کروں ، وہ ولد الزنا کو آزاد کرنے سے بہتر ہے “ ۔ [سنن ابن ماجه/حدیث: 2531]

ام المؤمنین عائشہ رضی اللہ عنہا سے روایت ہے کہ ان کے پاس ایک غلام اور ایک لونڈی میاں بیوی تھے ، انہوں نے کہا : اللہ کے رسول ! میں ان دونوں کو آزاد کرنا چاہتی ہوں ، رسول اللہ صلی اللہ علیہ وسلم نے فرمایا : ” اگر تم ان دونوں کو آزاد کرنا چاہتی ہو تو عورت سے پہلے مرد کو آزاد کرو “ ۔ [سنن ابن ماجه/حدیث: 2532]