سنن النسائي - حدیث نمبر 5706

ابومسعود رضی اللہ عنہ کہتے ہیں کہ نبی اکرم صلی اللہ علیہ وسلم کعبے کے پاس پیاسے ہو گئے ، تو آپ نے پانی طلب کیا ۔ آپ کے پاس مشکیزہ میں بنی ہوئی نبیذ لائی گئی ۔ آپ نے اسے سونگھا اور منہ ٹیڑھا کیا ( ناپسندیدگی کا اظہار کیا ) فرمایا : ” میرے پاس زمزم کا ایک ڈول لاؤ “ ، آپ نے اس میں تھوڑا پانی ملایا پھر پیا ، ایک شخص بولا : اللہ کے رسول ! کیا یہ حرام ہے ؟ آپ نے فرمایا : ” نہیں “ ۔ ( ابوعبدالرحمٰن نسائی کہتے ہیں : ) یہ ضعیف ہے ، اس لیے کہ یحییٰ بن یمان اس کی روایت میں اکیلے ہیں ، سفیان کے دوسرے تلامذہ نے اسے روایت نہیں کیا ۔ اور یحییٰ بن یمان کی حدیث سے دلیل نہیں لی جا سکتی اس لیے کہ ان کا حافظہ ٹھیک نہیں اور وہ غلطیاں بہت کرتے ہیں ۔ [سنن نسائي/حدیث: 5706]